تداولات مواقع التواصل الاجتماعي فيديو كيبان فيه امرأة كتقول باللي هي والدة الستريمر المعروف إلياس المالكي، اللي متابع دابا وهو معتاقل على خلفية تهم السب والقذف والتشهير. السيدة هضرات فالتسجيل على ما وصفاتو بمحاولة مساومة مقابل الحصول على تنازل يفيد ولدها.
وحسب اللي جا فالفيديو المتداول، كتأكد المرأة أنه تْطلب منها تخلص مبلغ كيوصل لحوالي 80 مليون سنتيم، مقابل تنازلات يقدرو يساهمو فإطلاق سراح ابنها، وهو الشي اللي خلق تفاعل كبير وجدال واسع فمواقع التواصل.
ومن جهتو، نفى المحامي بوشعيب الصوفي بشكل قاطع، فتصريحات لوسائل إعلام وطنية، تكون عندو أي علاقة بالتسجيل المتداول، وأكد باللي الشخص اللي كان كيهضر مع المرأة وكيطلب منها تمشي لمكتب فالدار البيضاء من أجل “تسوية الملف” قبل الجلسة، ما عندو حتى صلة بيه.
ويشار إلى أن هوية المرأة اللي ظهرت فالفيديو ما تأكداتش رسمياً، وما تذكر لا الاسم الكامل ديالها ولا هوية أو صفة الشخص اللي تواصل معها، واش محامي ولا مسؤول نقابي، الشي اللي كيخلي بزاف ديال علامات الاستفهام مطروحة فانتظار التحقيقات أو توضيحات رسمية.
